Паважаныя чытачы!
Зьвярніце, калі ласка, увагу. Вам прапануецца рукапіс, а не кніга, якая прайшла адпаведную падрыхтоўку да выданьня. Таму ў рукапісе могуць сустракацца дробныя памылкі й нязначныя недакладнасьці. Мы ўдзячныя ўсім, хто дасылае нам свае заўвагі ды прапановы, і імкнемся ўзяць іх на ўлік. Падчас падрыхтоўкі апошняй (восьмай) рэдакцыі падручніка мы ўлічылі ўсе заўвагі, якія на сёньняшні момант атрымалі альбо знайшлі ў Інтэрнэт (гл. тутака >>).
Мы вітаем канструктыўную крытыку, якая дапамагае ў працы, падказвае, як зрабіць правільна, як зрабіць найлепш, і прымаем яе з удзячнасьцю.

С.Аляксандраў, Г.Мыцык
люты-сакавік 2003

Шаноўны дружа!

Хай будзе блаславёны той час, калi ты наважыўся вучыць мову нашага народу. Хто б ты ня быў — навучэнец, мiнiстар, бiзнэсовец, настаўнiк, проста аматар слова — гэтая кнiга прыдасца табе. Яна дапаможа самастойна вывучаць мову мэтадам размоўнае практыкi.

Кнiга такога кшталту выходзiць на Беларусi ўпершыню. У самай даступнай форме, з дапамогай шматлiкiх малюнкаў паказана iндывiдуальнасьць, адметнасьць беларускай мовы — багацьце яе фанэтычных, граматычных i лексычных асаблiвасьцяў.

Лад мовы i неабходныя тэарэтычныя зьвесткi разьмеркаваны на 17 занятках, у кожным зь якiх паказана будова моўных канструкцыяў. Уся ўвага скiраваная на фармаваньне камунiкатыўных i маўленчых навыкаў.

Багаты iлюстрацыйны матэрыял аздабляецца ў кнiзе гумарам галоўнага героя — Яся. У вабразках “Ясь распавядае”, “Па-беларуску кажуць так” пададзеныя варыянты формаў вуснай лiтаратурнай мовы ў ладзе з гутарковым стылем. Дыялёгi насычаны словамi, адпаведнымi духу мовы, з багацьцем сэнсу выказваньня й яго адценьняў.

Пры чытаньні вы адчуеце сьпеўнасьць, мяккасьць, мiлагучнасьць беларускае мовы. Адметнасьць беларускае мовы ў гарманічнай спалучальнасьці гукаў.

Гэтая кнiга для тых, хто цiкавiцца беларускаю моваю, спрыяе ёй i хоча вывучаць самастойна. Жадаем вам гэтулькi посьпеху, колькi й ахвоты.

Цi то на працы, цi то ў гатэлi, на вулiцы, у краме — усюды хай гучыць беларуская мова з вашых вуснаў нязмушана, лёгка й натуральна. Па-беларуску запрашайце, сустракайце, частуйце!

Аўтары.

Падзякі.
Дзякуем усім тым, хто так ці інакш дапамагаў нам: П.Фадзееву, В.Мароз, Ул.Содалю, Ул.Маруціку, З.Санько, В.Раманцэвіч, А.Трусаву, Л.Дзіцэвіч, С.Кручкову ды ўсім, хто даслаў нам свае лісты з заўвагамі, пытаньнямі, прапановамі. Шчыры вам дзякуй!

Асобная ўдзячнасьць кампаніі "Інтэлектуальны Партнэр" і стваральнікам сайту "Беларуская Палічка" за ўвагу ды падтрымку.